تاج هديه ليا

السلام عليكم و رحمة الله و بركاته

التاج ده يا جماعه ماكنتش متوقعه انى أجاوب على أسئلته أبدا ، التاج أصلا أنا أهديته لأميرة (غربتى ) و بعدين أنا و أميرة أهدينا هذا التاج للأخ المعتصم و الأخ معتصم حب يخلص تاره فأهدانى التاج و من حفر حفرة لأخيه و قع فيها

و طبعا أنا لازم أجاوب على الأسئله بدون أى اعتراض

أنا طبعا بشكره و ربنا يكرمه يارب و يوفقه لما يحب ويرضى

1- بدأت تدونى امتى ودخلتى عالم التدوين ازاي ؟

دخلت عالم التدوين فى شهر نوفمبر 2008 و ماكنتش أعرف حاجه عن التدوين لكن صاحبتى د/ ولاء صلاح صاحبة مدونة دمعة حنين هى اللى عرفتنى

2-مين أكتر حد بتحبى تعليقه على بوستك الجديد؟

بحب كل الناسى اللى بتعلق عندى و تفيدنى برأيها و نقدها

3-ايه أهم حاجة اتعلمتيها من التدوين؟

اتعلمت من التدوين حاجات كتير منها أنى أشارك فى الرأى وأقول رأيى و أعبر عن نفسى وأعبر عن غيرى وأحس بمشاكل غيرى

4-حاسه ان التدوين له تأثير؟

طبعا التدوين له تأثير كبير بس ده بيكون على حسب الحاجه اللى بتتكتب لو حاجه كويسه أكيد التأثير بيكون كويس و على العكس طبعا لو بنكتب حاجه مش كويسه
ربنا يجعلنى دايما أكون سبب فى تأثير كويس

التدوين سبب فى تكوين صداقات جميله ليا صداقات أساسها الحب فى الله

5-اذكرى خمسة أحلام تخص مستقبلك؟

1- ربنا ينصر المسلمين و يذل المشركين و نحرر المسجد الأقصى إن شاء الله

2-ربنا يرضى عنى و يجعلنى من أهل الجنه ويرزقنى لذة النظر إلى وجهه الكريم و ينعم عليا برؤية سيدنا محمد صلى الله عليه وسلم

3- ربنا يرزقنى الزوج الصالح اللى يخاف عليا و يتقى الله فيا و يرزقنى الذريه الصالحه

4- ربنا يرزقنى زيارة بيته الحرام يااااااااااااااااااااه نفسى أروح أصلى هناك و أشوف الكعبه و أقعد أعيط هناك

5- نفسى أشتغل بتخصصى اللى هو الإيطالى أصل درسته فى الكليه 4 سنين وصعبان عليا قوى ركنته , أنا الحمد لله صحيح بستخدم الإنجليزى دلوقتى فى شغلى بس نفسى أشتغل بالإيطالى مش طمع والله بس عشان ماأنساش الإيطالى

6- اذكرى شخصين على الأقل متواجدين في حياتك حاليا كنت تود وجودهم من زمن؟

هو الأكيد إن كل إنسان بيظهر فى حياتى بيكون بسبب و له تأثيره فى الفتره اللى بيظهر فيها

و من الشخصيات اللى بحبها هى والدة صاحبتى (قمة فى الحنيه و الطيبه ) كان نفسى تكون موجوده فى حياتى من زمان

7-على من تطلقى الرصاص؟

أطلق الرصاص على الكفرة اللى بيضروا المسلمين

8-ماهى السعادة من وجهة نظرك؟

السعادة شعور جميل جدا بتيجى من الرضا بقضاء الله و قدره و من القناعه

9-كيف تصلى إلى السعادة؟

أصل إلى السعاده بالقناعه و الرضا بقضاءالله و قدره ، أصل إلى السعادة بإنى أساعد أى إنسان محتاج

10- هل السعادة وهم أم أنها حلم صعب؟

السعادة لا هى وهم و لا هى حلم صعب هى احساس جميل لما بيمر عليا طيفه بتمنى انى أعيش فيه على طول

11-ماهى أكثر اللحظات التى شعرت فيها بالسعادة؟

أكثر اللحظات اللى شعرت فيها بالسعادة لما بحس أن ربى راضى عليا أحيانا الواحد مننا بيحس انه ربنا راضى عليه ساعتها بجد بيكون احساس جميل جدا كأنى ملكت الدنيا كلها و مش عايزه حاجه تانيه وبكون مش عايزه الإحساس ده يسيبنى و يبعد عنى

كمان من اللحظات اللى شعرت فيها بالسعادة لما نجحت فى الثانويه العامه و قالوا لى مبروك طلعتى الأولى على المدرسة كنت بجد هموت من الفرحه و مش مصدقه نفسى

12-هل أنت متفاؤل وعندك أمل؟

الحمد لله عندى شوية تفاؤل و أملى فى ربنا كبير

13- ايه أكتر شئ بتحبيه و أكتر شئ بتكرهيه؟

أكتر شئ أحبه الهدوء و الحنان و أكتر شئ أكرهه الظلم

14- ضعى مرادف أو تعريف من عندك لكل كلمه :
الحب : احساس جميل، الحياة تكون صعبه من غيره
الحنان : إيد تطبطب عليا بحنيه و تسألنى ع اللى بيا
الرحمة : رحمة ربنا التى وسعت كل شئ ، الرحمة بشوفها فى تعاليم الدين الإسلامى فى حاجات كتير مثلا لما ربنا يعطينا الحسنه بعشرة أمثالها والسيئه بسيئه، ربنا يرحمنا برحمته

التفاؤل : سر الحياة ، من غيره هيكون فيه تشاؤم والحياة تبقى صعبه قوى بالتشاؤم
السعادة : رضا ربى عليا ، و القناعه

15- ما هى مواصفات فارس أحلامك؟

أهم شئ يكون على خلق و دين ، يتقى الله فيا ، صبور ، و مهم جداجداإلى مالا نهايه إنه يكون حنون، يسألنى كل يوم قرأتى وردك فى القرأن النهارده ؟، يكون مثقف ويعرف أكتر منى

16-صفات تتمني تكون موجوده فيكي ؟

أكون حسنة الظن ، و أكون جريئه شويه (مش قوى)لأنى احيان كتير بكون خجوله ، الجرأه الزياده عن اللازم مش حلوه

17- اصعب موقف حصلك واطرف موقف؟

أصعب موقف مريت بيه لما كنت مسافرة مصر عشان الكليه و راحه أسكن فى المدينه الجامعيه كانت أول مرة أسيب بلدى وقعدت أعيط ساعة ماسابونى و مشيوا

موقف تانى معلش يا جماعه استحملونى لما سافرت مصر فى الأول ركبت المترو،و المحطه اللى هنزل فيها عدت عليا و اضطريت أنزل فى محطه تانيه وكنت وصلت مصر بالليل كنت خايفه بس الحمد لله ولاد الحلال قالوا لى أغير الإتجاه ووصلت مدينتى بالسلامه

أطرف موقف حصل لى لما كنت فى المدينه طبعا انتم عارفين العيشه هناك ازاى كان عندنا فى الأوضه سرير بدورين كانت نسرين صاحبتى فى الدور الأول المهم طلعت انا فى الدور التانى و طلع معايا هناء و رانيا عشان نقعد فوق هههههههه ماتشوفوش اللى جرا السرير كان هيقع بينا عينك ماتشوف الا النور نسرين بقت هتموت من الخوف تحت أحسن نقع عليها و أحنا فوق ميتين من الضحك عايزين حد يمسك السرير عشان ننزل

18- الصفات اللي بتحبيها وتكرهيها في نفسك ؟

الصفات اللى بحبها فى نفسى الإصرار لما بكون عايزة أعمل حاجه لازم أعملها ماعرفش أنام إلا لما أعملها ، بحب أعرف أى حاجه فى كل حاجه يعنى بحب أتعلم و أتثقف ، بحب فى نفسى الإخلاص

الصفات اللى بكرهها فى نفسى مش بقدر أنسى الأسيه لو حد قسى عليا بفضل فاكرة وبحاول دايما و بدعى ربى انى أكون دايما من اللى بيسامحوا، وبكره فى نفسى الحساسيه الزياده عن اللازم هى اللى جايبانى لورا

19-حاجة عملتيها قبل كده وتتمني تعمليها تاني؟ حاجة عملتيها قبل كده وماتتمنيش تعمليها تاني؟

الحاجه اللى عملتها قبل كده و أتمنى أعملها تانى أروح تانى مع صحباتى مسجد النور فى العباسيه كنا روحنا هناك شله لما كنا سوا فى مصر أيام الدراسه

وحاجه تانيه عملتها ونفسى أعملها تانى نفسى أروح معرض الكتاب

أما الحاجه اللى عملتها وماتمناش أعملها تانى هى لما اتخرجت من الكليه قالوا ان فى مسابقه هتنزل للتوظيف الحكومى بس عشان تتقبلى فيها لازم تعملى محو أميه ل15 فرد على الأقل وطبعا قعدت أدور على أميين ولازم أقنعهم عشان يعطونى صوربطايقهم اتبهدلت بهدله ولما زهقت سيبت الموضوع ماقدرتش أكمل فيه بس الحمد لله على كل شئ

20-ايه رأيك في الحب وبكل صراحه؟

الحب احساس جميل، صعبة الحياه من غيره

21- لخصي الحياه في سطر واحد؟

الحياة قصيره ، دار امتحان و ابتلاء ، ربنا يخرجنا منها على خير

22-امتى وليه تخبي دموعك وضحكتك؟

أنا للأسف مش بقدر أخبى دموعى خالص أنا عامله زى الحنفيه اللى بتتفتح

أخبى ضحكتى لما يكون اللى قدام منى زعلان و حزين

23-لو جتلك الفرصه تعبري عن شعورك تجاه شخص معين هتقوليه ايه ادام كل الناس؟

لو شخص عزيز عليا هعبر عن شعورى لكن فى حدود و باحترام لأن طبعا لازم يكون عندى حياء

لو شخص مش بحبه هسكت مش هقول حاجه

24-اكتر حاجة بتعمليها في يومك؟

طبعالازم بروح شغلى ، قاعده قدام الكمبيوتر والنت

25- مثلك الاعلى اللي تتمني تبقى زيه؟
مثلى الأعلى طبعا سيدنا محمد صلى الله عليه وسلم وبعدين أى شخصيه تكون ناجحة وتلفت انتباهى بنجاحها

26- الحاجه اللي لو ربحتيها اكنك ملكتي العالم كله؟

رضا ربنا عليا ياااااااااااااااااااااااه ،يارب يرضى عنى

27- نقطه ضعفك؟

نقطة ضعفى الحساسيه الزيادة عن اللازم ، وقلبى ضعيف بيتأثر بأى شئ بسرعه

28- لو تحبى تهدى التاج لشخص تهديه لمين؟

أهدى التاج لكل شخص شاركنى أفراحى وأحزانى هنا فى مدونتى